انا عارف ان إيد الفنان (هشام سليم) طاليه؛ خاصة في بلد تعبد المشاهير، وعارف ان المال والمعارف اللي معاه تخليه ياخد اللي عاوزه من غير ما حد يقوله وقف عندك! حرام دا مال غلابة وشقا عمر ناس. عارف ان القوة والقدرة بتعمي ضمير الانسان وتخليه ينسى حاجات كتير. عارف يا فنان (هشام سليم) فيه رب قادر يرد الحق لصحابه... فيه رب قادر يخلق ولاد الحلال في طريق الغلابة ويخليهم في صفهم. عارف يا فنان (هشام سليم) عمري ما هصدق ان الحق ضعيف، وواثق ان ربنا هيدبنا حقنا منك... اوعى تفتكر انك اخدت عمارتنا وشققنا والموضوع انتهي... حقنا عندك وربنا مش هيسيبه، ربنا اكيد معانا لان الحق معانا والقروض والجمعيات اللي دخلنا فيها علشان نشتري الشقق دي تشهد... هو (الله) شايف وعارف، هو نصير الغلابة يا فنان (هشام سليم) بس الموضوع عاوز صبر... واحنا عنينا للسما مرفوعة ومتأكدين ان الفرح والحق هييجوا من رب العباد اللي هو اقوى من الكل ومنك يا فنان (هشام سليم). ساعة ما تلاقي حالة زي حالتنا... يبقي فعلا احنا في بلد القانون.